今晚英超尾场上演「双城斗」，曼城主场硬撼「狐狸」李斯特城。曼城近期闹兵荒，只係得番13个一队球员可以候命，甚至冇锋可用焗用新仔，火力削弱，「狐狸」作客亦唔敢轻举妄动，近年联赛碰头坚旺半场和，值得再追。
力图重夺英超冠宝座嘅曼城，开季即遇上严重兵荒，一直抖紧嘅阿根廷前锋阿古路预计要养伤多2个月，加比尔捷西斯係唯一前锋，点知呢位巴西国脚上场联赛受伤，巴西足总日前证实佢已退出下月上旬嘅国际赛，检查发现佢小腿受伤，休息时间至少3周，相信曼城要焗用17岁前锋利姆戴纳，呢位小将喺上周中英联盃处子上阵对般尼茅夫即有入波，但嚟到英超场合，不宜高估。
除咗阿古路同「耶稣仔」，奥达文迪、贝拿度施华、辛真高同祖奥简斯路都受伤，拿朴迪同根度简就因早前确诊新冠肺炎未能复出，曼城目前只有13个一队球员可以候命，坚惨。因此哥迪奥拿都话，呢个时间就轮到青训系统发挥作用，畀机会有质素嘅球员上阵，不过新仔始终经验不足，难免怯场影响发挥。
李城作客稳阵行先
另一边厢，李斯特城係5支英超开季2连胜球队之一，除咗射手占美华迪之外，哈维班尼斯、丹尼斯普拉特等主力极速上力，虽然上周中英联盃畀阿仙奴踢出局，但佢哋尽出副选咁滞，真係留晒力打今仗。翻查纪录，双方近5次联赛交手，有4次开半场和，证明「狐狸」每斗曼城都稳阵行先，半场和不妨追多铺。
