虽然曼联新7号卡云尼今次冇份，但乌拉圭用苏亚雷斯（图）以老带新，麦斯高美斯等新星轮住博上位，相反智利仍要倚赖阿历斯山齐士（图）等老将孭飞，相形见础，加上作客例脚软，乌拉圭有力旗开得胜。
乌拉圭老帅泰巴尼斯已掌帅14年，因为多年来坚持重用老班底，换血力度唔大而备受批评，呢位73岁教头近年亦痛定思痛，逐渐为球队进行更替。乌拉圭仍有苏亚雷斯、高甸等老将压阵，但呢班领袖肩负起以老带新嘅重任，单睇今次名单，虽然岩岩加盟曼联嘅另一老将卡云尼落选，不过仲有喺欧洲打出名堂嘅宾坦古亚、卢卡斯托拉拿、麦斯高美斯及费达历高华维迪等撑住，其中费达历高华维迪喺皇马更站稳阵脚，呢班第二梯队可望顺利接班。
智利靠老将顶档
相反，智利近年欠缺具实力嘅新星冒起，阿历斯山齐士（A山）、伊斯拿、维达尔、伊度亚度华加斯等两捧美洲盃嘅旧班底，依然未变，但个个都至少3张，而且佢的近年发展都走下坡，其中A山效力曼联嗰阵冇料到，上年重返意甲加盟国米又伤多过踢，令人失望。睇番智利上届世盃外最后6场作客，只得1和5负，包括输畀厄瓜多尔同玻利维亚，见到都唔开胃，而且近6次造访乌拉圭，只得2和4负未赢过，今仗凶多吉少。
