今晚热身赛戏码有「英伦打吡」，英格兰喺温布莱球场迎战爱尔兰。「三狮兵团」领队修夫基擅用热身赛练兵，喜用年轻球员试阵，上轮国际赛对威尔斯可见一斑，今场预计都係畀替补球员演吓身价。爱尔兰踢法稳阵，近11赛事有10场半场同对手打和，今仗随时又同英军半场不分胜负。
英军备战欧国联作客比利时及主场对冰岛都有啲阻滞，阿历山大阿诺特及禾特普斯受伤退队，拉舒福特膊头有少少伤，要到最后阶段先决定踢唔踢。领队修夫基又提升幼狮，佢搵咗17岁嘅祖迪比宁咸顶替禾特普斯嘅位置。祖迪比宁咸上季喺伯明翰以16岁零63日成为球队史上最年轻入球者，今夏被多蒙特收购，亦喺9月德国盃上阵入波，打破「蜜蜂兵团」最年轻入球纪录。
祖迪比宁咸今场有可能后备登场，但正选都会由一班「小狮兄」担正。上轮国际赛，英格兰同样应付一场热身赛加2场欧国联，热身赛主要畀替补球员，如卡维特利云、基亚利殊及尼克普比等落场磨练吓。虽则哈利马古尼及列斯占士上场欧国联对丹麦食红牌要停赛，今场只係有友赛唔受限制，相信佢哋都会担正。
爱尔兰防守纪律性高
其实爱尔兰阵中都有「幼狮」成员，前锋哥林罗宾逊曾经代表英格兰U16、U17、U19及U20梯队，但就係未能获得大国脚领队青睐，结果佢喺2018年选择代表爱尔兰出战，相信对住英军，呢名西布朗前锋都会加多两钱肉紧。
虽然爱尔兰实力未及英格兰，但佢哋防守有纪律，近11场国际赛，有10场同对手半场打和，相信今场佢哋屯重兵防守，可以顶住英格兰半场，半场和机会极高。
