北爱尔兰中场 史提芬戴维斯
周五凌晨欧国附B组决赛，北爱尔兰主场迎战斯洛伐克，两支球队实力接近，双方喺4强战都係靠互射12码赢波晋级。作客嘅斯洛伐克球员平均技术较好，但係以老将咸锡为首嘅锋线略嫌活力不足，面对防守硬淨嘅北爱尔兰难佔甜头。不过北爱尔兰锋力亦见疲弱，同样欠缺争胜本钱，今场极可能以闷战收场，捧中位数2.5球入球细最好路。
北爱尔兰喺欧国外分组赛同德国、荷兰两大班霸同组，最后压过白俄罗斯同爱沙尼亚，攞到小组第3名成绩已经有晒交待，当中主场0比0守和荷兰更加係代表作。北爱尔兰拥有一条「英超级」防线，以李斯特城中坚庄尼伊云斯为首，加上列斯联嘅史超活达拉斯同纽卡素嘅查马李维士，北爱尔兰防守能力唔弱。然而呢支奇兵前锋线缺乏数胡人物，因此过去5场赛事，一味靠守之下有4场法定时间总入球都开出2球或以下。
仲靠咸锡恶唔出样
斯洛伐克喺欧国联成绩差劲，目前于B2组4战1和3负排包尾，球队青黄不接问题严重，曾经风光嘅斯洛伐克仍然依赖去咗中超落班嘅33岁进攻中场咸锡主宰进攻，踢法欠缺板斧，因此近年成绩每况愈下。斯洛伐克上月喺欧国联作客同样防守硬淨嘅苏格兰，最终以0比1落败，相信今场战况亦会雷同，预计入球数字偏低，捧细盘最稳阵。
