丹麦上晒力轰炸鱼腩冰岛
A2组另一场丹麦对冰岛，丹麦喺欧国联表现比预期好，尤其上轮作客1比0击败英格兰，令佢哋有机会争小组冠军，冰岛实力所限，2届欧国联踢咗8场全部输晒，踢过嘅3场作客赛事，亦全部输2球或以上，丹麦遇呢组鱼腩当然可以大炒番场，让球主胜放心捧。
冰岛喺上届欧国盃踢咗一个令人振奋嘅决赛周，不过之后已经无以为继，上届欧国联A级联赛4场分组赛全部输晒，其实应该降班，只不过今届重组，A组联赛由12队变咗16队，佢哋可以掹车边留喺度。不过，今届佢哋抽正同比利时、英格兰及丹麦同组，4场分组赛又係输晒，累积欧国联8连败。
冰岛欧国联8连败
唔单止欧国联，喺上周举行嘅欧国附决赛，冰岛喺大部分时间领先1球之下，到88分钟被匈牙利追平，再于补时失多1粒，将决赛周资格拱手相让畀匈牙利，相信现时冰岛更衣室气氛应该好差。
丹麦愈战愈勇，最近4场国际赛全胜之馀，仲保持1球不失，防守非常硬淨，球队喺基斯甸艾历臣、安达斯基斯坦臣及尤素夫保臣带领之下，上轮作客击败英格兰，手执出线主导权，今场只要击败冰岛，最后一场斗比利时就係首名之争，所以唔会手软，尤其冰岛近3场欧国联作客全输2球或以上，丹麦绝对有能力大胜一场，为压轴一战壮士气。
