韦斯咸细盘好路
车仔哑火举步维艰
今晚英超尾场上演「伦敦打吡」，车路士主场火併韦斯咸。「车仔」近况走下坡，已经连输两场仅入1球，锋线球员非伤即沉，打乱领队林柏特部署，今场遇上大勇嘅韦斯咸，并冇必胜把握。事实上车路士近3次主场对韦斯咸，仅为1胜1和1负，而且3场总入球都係2球或以下，预料今仗再次出现拉锯局面，博中位数2.5球嘅入球细较划算。
车路士早前曾经连续9场英超不败，但其后爆出伤兵潮，当中以两位翼锋薛耶治及赫臣奥杜尔受伤缺阵影响最大，领队林柏特一度改用贵价兵夏维斯踢边路，可惜效果并唔理想。虽然薛耶治及赫臣奥杜尔近日已经复操，但状态成疑，即使可以上阵，恐怕亦未必能够发挥出十足水准。
事实上，林柏特亦讲过必须确保球员已经恢复足够状态，先至会派上阵，所以薛耶治、赫臣奥杜尔今场都未必会披甲，最惨係老将基奥特近期表现回落，德国前锋迪姆华拿水准飘忽，近期接连不敌爱华顿及狼队，可见车路士锋力确实冇之前咁锐利。
「锤仔」遇豪门唔输蚀
另一边厢，「锤仔帮」韦斯咸经过领队莫耶斯调校后，今季表现有明显进步，近6场英超取得4胜1和1负，唯一败仗係主场不敌「作客王」曼联，实属非战之罪。韦斯咸今季面对传统豪门往往踢出超水准，包括曾经打和曼城及热刺，加上两军近6次碰头，有5次总入球开2球或以下，包括3次喺史丹福桥交锋，今场2.5球细盘属明智之选。
