史浩克留力益晒禾堡
护级紧要过争盃
今晚德盃16强有免费直播，由禾夫斯堡主场火併史浩克04。喺冬窗临闩前疯狂借兵嘅史浩克护级大过天，盃赛场合无谓嘥力，何况禾堡无论状态定往绩都胜一筹，主胜乃不二之选。
「矿工」史浩克喺冬窗动作多多，继哥拉辛拿斯同亨特拉尔回巢救亡后，于临闩窗前再签入同阿仙奴解约、以自由身来投嘅中坚梅斯达菲，并且提早同贺比马菲提前签下佢首份职业合约，呢位美国小将正係连中三元击败贺芬咸，终止跨季30场联赛不胜嘅福将。
「狼堡」3连胜弗爆
不过突然有咁多新兵来投，史浩克仍需时间磨合，而且佢哋依家负债高达2.4亿欧元，因此首要目标係留番喺德甲，呢支包尾大幡落后尾3嘅比勒费尔德9分，护级形势水深火热，实在无暇兼顾德盃。
相反，禾堡今季走势唔错，现于联赛位居三甲，连埋盃赛在内，近18仗只係输过2场咁大把，仲要係输畀劲旅拜仁同多蒙特，绝对唔失礼。「狼堡」近3场全胜，单计近8场主场7胜1和弗到漏油，其中最突出嘅梗係韦格贺斯，呢位荷兰中锋今季联赛已有13球进帐，单计近7仗亦攻入6粒，包括上圈德盃大胜辛特侯逊4比0之役省两粒，脚风奇顺，加上近2次交手禾堡赢晒，韦格贺斯亦入3粒，要赢无心恋战嘅「矿工」冇难度。
