锡菲联死守细顶车路士
两支近期表现回勇嘅球队对碰，锡菲联主场迎战车路士。锡菲联近期频频抢分，但对劲旅点都会安守本分，打出最耍家嘅稳守突击，车路士喺杜曹接手后，3场联赛全部保持不失，不过佢似乎仍未搵到最佳攻击组合，今场即使赢波都未必係大炒格，宁捧2.5球入球细。
锡菲联经历开季17场联赛不胜后，近5场联赛3胜2负表现回勇，作客2比1击败曼联一仗可谓今季代表作，上周中主场亦以相同比数杀退西布朗，全取3分，护级露出曙光。
不过有一点值得留意，其实呢两场胜仗中间，係夹住1场作客曼城，嗰场锡菲联以0比1输波；睇番赛后统计，锡菲联控球率只得25%，射门4次只有1次中目标，全场1个角球都冇，基本上係全军退守。领队韦达深明对住劲旅硬碰硬冇着数，即使上半场9分钟已经失波，但球队保持纪律性，冇急于反扑，虽然未能扳平，但不致多失，预料今场斗车路士情况一样。
攻力问题未解决
作客嘅车路士自杜曹上任后，球队战术亦重新建立，以控、传为主嘅踢法令「车仔」能够控制战局，343阵式亦令攻守更平衡，令球队3场保持不失。杜曹正努力寻找最佳进攻阵式，因为委派赫臣奥杜尔出任辅锋，抑或基斯甸普列锡做「假9」，都未能支援迪姆华拿入波，上场击败热刺都只係靠12码，遇着死守嘅锡菲联随时老鼠拉龟，捧2.5球入球细啱数。
