水晶宫缺沙夏难有作为 恶客曼联抢W保前4
今晚英超压轴尾场，2哥曼联作客斗水晶宫。曼联上场同车路士互交白卷，成功保住今季联赛作客不败之身，为保前4席位，今仗不容再失。而且佢哋联赛造访水晶宫例食住对手，加上主队冇咗王牌韦费特沙夏，热捧客W。
曼联季初曾喺主场倒灶1比3输畀水晶宫，不过之后回复水准，至今26场联赛得50分排紧第2位，未计周中赛事，现时以12分落后榜首曼城，虽然争标机会唔大，但仍要力争前4位置确保下届欧联入场券。曼联上场联赛作客车路士闷和0比0，整体发挥唔错，期间球证更漏判一个12码畀曼联，失分有啲唔抵。佢哋今季13场联赛作客，取得8胜5和未输过，客场演出比主场更稳定，而且下场仲要作客曼城合演「曼市打吡」，一定想赢波壮声威。
水晶宫遇强脚软
水晶宫上场联赛同样互交白卷，但对手只係尾3嘅富咸，不过你咪理，佢哋依家已甩开富咸10分，护级前途一片光明，随时拣波踢。水晶宫踢得咁保守，主因係韦费特沙夏仲养紧伤，众所周知水晶宫冇咗沙夏战斗力大减，有统计显示，呢位王牌缺阵22场赛事，水晶宫就输咗18场，今仗呢位科特迪瓦箭头继续倦勤，难望反弹。
虽然水晶宫首循环赢过曼联，但今季斗曼城、车路士均曾淨吞4蛋，对利物浦更惨败0比7，遇强脚软，加上曼联近7次联赛作客水晶宫获6胜1和，其中近4次赢晒，今仗客Ｗ走唔甩。
