车仔澹定上盘有钱剩
列斯联「最癫踢法」遇剋星
今晚英超早场，「最癫」嘅列斯联主场迎战「最定」嘅车路士。车仔自杜曹上任后稳定性全面提升，所有赛事11战保持不败，近8场联赛豪取6胜2和；列斯联踢法娱乐性强，但稳定性不足，近5场联赛只得1胜4负，车仔今场绝对有力以质取胜，以3分贺一贺球会早几日116岁会庆，车仔让半一捧上盘。
3月10日係车路士会庆，呢支伦敦劲旅上轮喺主场以2比0击败爱华顿，现时28战得50分排第4，差次席曼联4分，但亦只比少踢1场嘅韦斯咸多2分，前4席位唔稳阵，虽然佢哋下周欧联16强次回合于主场再斗马体会，但为保前4位置，今场3分志在必得。
杜曹利用3后衞配合传控踢法，增加咗球队嘅稳定性，佢上任后所有赛事11战保持不败，当中9场冇失波，夹埋只失2球，近8场联赛豪取6胜2和，呢种稳阵踢法正正剋制到列斯联主帅比尔沙嘅进攻战术。
列斯联挂住攻防线鬆散
列斯联主张不停进攻，每每造成后防鬆散，成绩时好时坏，连同上场作客韦斯咸输0比2，近5场输4场，现时以35分排第11位，距离传统护级线40分差5分，压力唔算好大，加上今场有加云菲腊斯复出，随时「心雄」同车仔斗攻，咁就中正杜曹下怀。列斯联中场线好多时压得太前，同中坚之间有太多空间，车仔正正可以利用呢点进攻，以佢哋球员嘅质素，唔难搵到入波机会，加上夏维斯上仗有出色表现，让半一上盘不容错过。
