C朗攞威葡国发到维
上轮食白果成肚火
今晚世盃外欧洲区A组续演好戏，塞尔维亚主场硬撼葡萄牙。双方首仗均旗开得胜，不过葡萄牙上仗赢得肉酸，队长C朗更加食白果坚失威，今仗誓要入多几粒，向伊朗名宿戴伊嘅国际赛入球纪录进发，何况近年碰头食住塞尔维亚，客胜值得捧场。
葡萄牙日前于首仗世盃外对鱼腩阿塞拜疆，唔单止队长C朗担正，仲有贝拿度施华、安达施华等压阵，而般奴费南迪斯、祖奥菲历斯亦有后备落场，精锐尽出之下，全场有多达31次攻门，最终竟然只靠对手嘅乌龙波小胜1比0，非常羞家，C朗无论远射定出埋倒挂都唔入，冇晒飞士。呢位性格巨星一向唔衰得，依家佢喺国际赛累积102球，只差7粒就可拍住伊朗名宿戴伊，成为国际赛入波最多球员，上仗遇弱却错失数胡机会，已经激到佢扎扎跳，今仗必搵塞尔维亚祭旗。
塞尔维亚防守欠稳
塞尔维亚喺名宿兼新帅史杜高域领军，日前于首仗世盃外以3比2击败爱尔兰，佢下半场「揿掣」换入阿历山大米祖域即省两粒，成为关键，虽然成功打响头炮，但唔好忘记爱尔兰喺之前7仗全部交白卷，佢哋竟然呢场入到两粒，可见塞军防守唔多稳阵。翻查纪录，两军近4次交手，葡萄牙取得3胜1和未输过，摆明格食格，客胜捧得过。
