葡军斗卢森堡细盘抵玩
C朗失准全队冇火花
世界盃外围赛欧洲区A组，球星如云嘅葡萄牙将会作客卢森堡，表面上双方实力强弱悬殊，但葡萄牙状态麻麻，巨星C朗脚头无灵，连续两场外围赛食白果，况且般奴费南迪斯亦唔及踢曼联时候抢眼，不宜高估。事实上，葡萄牙作客遇弱旅都係赢波至上，甚少大炒，加上近年对卢森堡亦算手下留情，近5次交锋总入球都係3球或以下，中位数3.5球嘅入球细值得捧场。
葡萄牙近年人才辈出，除咗队长C朗老而弥坚外，般奴费南迪斯、贝拿度施华、迪亚高祖达等亦喺所属球会挑起大樑。不过，佢哋踢埋一队为国家队出力，偏偏擦唔出火花。今届两场外围赛表现令人失望，首场对阿塞拜疆，葡萄牙全场有31次射门，最终只能靠对手摆乌龙小胜1比0，可见呢支2016年欧国盃盟主遇上弱队死守，缺乏破密集嘅方法。
再睇埋葡萄牙上场恶战塞尔维亚，佢哋领先两球下被逼和，球员消耗唔少体力，未必回得切气，加上为免重蹈上仗防线失误，痛失好局嘅教训，相信今场亦会特别小心，踢法上应该唔会太冒进。
卢森堡洗走鱼腩味
另一边厢，卢森堡近年已不再任人鱼肉，连同之前欧国联在内，近7场取得3胜1和3负，只失7球，总入球全开3球或以下，包括上场作客爆冷赢爱尔兰1比0，取得近13年以来首场国际大赛外围赛客场胜仗，阵营信心大增，可见防守确有进步。值得一提，上场入波功臣谢臣洛迪古斯喺葡萄牙出世，熟悉对手路数，相信可以为队友提供重要资讯，阻挡葡萄牙攻势，预料就算卢森堡今场输波，应该唔会咁易被大炒，入球细更加抵玩。
