车路士求稳细在必行
揸住两粒唔使心急
另一场欧联8强次回合，由车路士对战波图，今场比赛再次喺中立场西班牙举行。英超劲旅车路士首回合赢2比0，晋级形势一片大好，只要保持领先优势就完成任务，今场并冇必要冒险抢攻，加上车路士领队杜曹一向採取稳阵战术，「车仔」喺佢执教之下，近13场比赛有11场总入球都开出2球或以下，首选中位数2.5球嘅入球细。
车路士首回合攻势并唔算多，但胜在高效率，佢哋睇定嚟踢主要打传控，全场虽然只有6次射门，其中3次中目标，但结果就入咗两球。值得一提，出现第2个入球时，其实已经踢到比赛末段嘅85分钟，当时因为波图想收复失地而谷得太前，令防线出现严重错误，先至畀「车仔」嘅芝维尔偷到个波，顺势扭过埋门将，射入空门成2比0。无论比赛过程，抑或赛果都充分体现出杜曹嘅务实作风，就係唔需要急于同对手斗攻，而係先做好防守，有耐性等待机会，然后再发动致命一击。
事实上，车路士自从由杜曹领军之后，好多球评家及球迷都大讚「蓝战士」防守明显改善，因此大部分比赛都係小胜收场，更何况车路士今场打和都可以晋级，更加唔需要冒险抢攻，预料今场攻门次数同入球数字将会比首回合更少。
波图临门一脚欠质素
至于葡超球队波图首回合意料之外出现12次射门，比对手多出1倍，但却未能取得入球，可见佢哋进攻质素欠佳。其实波图可以喺16强淘汰意甲劲旅祖云达斯，主因係对手防线连番失误，而非本身攻力突出，所以嚟到8强遇上踢法四平八稳嘅车路士，立即一筹莫展，预料再次对战都难以喺对方身上取得入球，不妨再追入球细。
