利物浦细破般尼

抢分踢欧联要赢唔要靓

英超前4之争充满戏剧性，近期状态回勇嘅利物浦已重夺欧联入场券主导权，周四凌晨作客般尼，只要赢波即可杀入前4，因此馀下两场联赛实行当决赛咁踢。喺密集赛程加上不容有失情况下，利物浦只求「稳胜」不求华丽，踢法上会加倍小心，遇上防守硬淨嘅般尼相信入球数字唔会多，捧中位数3.5球入球细係明智之选。

赢晒两仗稳入前4

虽然未能衞冕英超锦标，但「红军」利物浦季尾状态亦回复稳定，自3月中开始未曾喺联赛落败；法宾奴泰华利斯重新担任防守中场位置后，后防稳健程度即时大大提升，成为球队战绩上扬嘅主要原因。虽然罗拔图法明奴今季脚风唔多顺，起脚射门经常中柱坚黑仔，但另一射手穆罕默德沙拿脚风开始转顺，近期频有士哥，而且「红军」上场亦转运，靠门将艾利臣比加喺补时阶段，谷上前接应角球顶入，绝杀西布朗，攞到救命3分，因此「红军」最后两场联赛赢晒的话，就好大机会攞到来届欧联资格，所以今场目标只有一个，就係赢波。

「红军」今场要擸晒3分之馀，亦要为紧接喺3日后进行嘅「煞科战」，主场对水晶宫一役部署。利物浦喺主力球星迪亚高祖达受伤情况下，领队高普更需要谨慎安排球员轮换，尽量保留球员体力踢埋最后呢两场关键战役，所以今仗作客踢法必定偏向先求稳阵，总之够赢就算，而且利物浦对上12场联赛，有11场总入球都开3球或以下，嚟到生死关头，难免踢得格外谨慎。

球迷入场全力顽抗

经过季尾一轮挣扎，主队般尼终于完成今季嘅护级任务，球队上下都鬆一口气；不过呢支由戴治执教嘅球队，向来踢法硬淨兼充满斗志，尤其是前锋基斯活特拥有高大身形，喺前线冲得又撞得，预计利物浦今场都会搵人好好招呼。更重要係今场般尼可以安排球迷入场，为报答球迷支持，一众球员肯定会加多两钱肉紧，冇咁容易畀「红军」擸走3分，因此利物浦入波难度必定大大增加，今场捧3.5球入球细机会较好。