欧霸王者战强细爆发
维拉利尔曼联斗硬淨
欧霸王者战今晚于波兰中立场上演，由「黄色潜艇」维拉利尔硬撼「红魔鬼」曼联。维拉利尔主帅艾美利有「欧霸之王」美誉，就算队波星味唔够亦不能睇小，红魔队长哈利马古尼未必出得，今仗一定先做好防守，加上两队近年碰头全部交白卷，喺一场过嘅决赛随时踢得更保守，2.5球嘅入球细抵玩。
今仗係维拉利尔主帅艾美利第5次领军杀入欧霸决赛，过往执教西维尔及阿仙奴取得3冠1亚，「欧霸之王」唔係浪得虚名，「黄色潜艇」喺佢麾下表现突出，不计分组赛尾轮对卡拉巴克，因对手多人确诊最终不战而胜，于今届13场欧霸取得11胜2和未输过。其中踏入淘汰赛更录得7胜1和佳绩，并有5场保持清白之身，包括4强次回合作客闷和另一英超球队阿仙奴，可见艾帅打淘汰赛例必先求稳阵。
近4次交手全开「窿窿」
曼联主帅苏斯克查打破4次盃赛4强止步嘅魔咒，今次终于杀入欧霸决赛，可惜赛前传来噩耗，5月头已受伤嘅哈利马古尼，虽然康复进度良好，但要赶及决赛披甲有啲抿水，冇咗呢位队长镇守防线，面对擅打反击嘅「黄色潜艇」前锋谢拉特摩兰奴同柏高艾卡沙，更加唔敢轻举妄动。翻查纪录，两军之前4次交手，竟然全部开出0比0，为免喺决赛一失足成千古恨，预计双方都会小心谨慎，2.5球嘅细盘捧得过。
