曼城车路士细纪争霸
王者战必小心谨慎
欧联王者对决今晚喺葡萄牙中立场爆发，由曼城硬撼车路士，亦係欧联决赛史上第3次嘅英超内讧。两军今届失球极少，防守同样稳阵。曼城力争首度成为欧洲王者兼荣膺3冠王，车仔主帅杜曹亦唔想连续两届决赛饮恨，必定踢得小心谨慎，加上近年盃赛碰头例少交收，必捧2.5球嘅入球细。
连同之前勇夺英联盃，今季英超盟主曼城只差欧联锦标，就荣升3冠王。主帅哥迪奥拿今季唔再盲目进攻，及时调整战术达到攻守平衡。由于箭头阿古路长期养伤，哥帅惟有改靠奇云迪布尼、根度简及马列斯等后上数胡，虽然进攻唔及以往锐利，但防守明显有改善，今季加盟嘅葡萄牙中坚鲁宾戴亚斯，更成为「蓝月亮」防线定海神针，凭住出色表现当选英格兰足球先生。曼城今届12仗欧联只失4粒，其中8场保持清白之身，可谓滴水不漏。
英超4哥车仔自杜曹季中接手后，成功拨乱反正，不过近期确有跌Watt迹象，唔单止喺英足盃决赛倒灶不敌李斯特城而饮恨，最后3轮联赛更两度落败，只因李城唔争气勉强保住第4。好彩防中尼高路简迪可望复出，佢有极强嘅跑动补位，犹如喺防线前筑起屏障，而喺尾轮联赛伤出嘅首席门神艾度亚文迪，周中已经复操，对巩固防线非常重要。
之前两次英超内讧全开细
查实车路士同样注重防守，今届12仗欧联同样仅失4球，拍住曼城冠绝群雄，尤其係德国领队杜曹上任后改踢3人防线，6场淘汰赛夹埋只失两粒，全开2球或以下，防守之佳可见一斑。「杜Sir」上届带领巴黎圣日耳门喺决赛输畀拜仁，唔想再做「二奶」，必定稳阵行先。翻查纪录，两军近3次盃赛交手全开2球或以下，而且之前两次英超内讧嘅欧联决赛，法定时间同样全开2球或以下，2.5球嘅细盘绝对係明智之选。
