阿联近仗火力收「细」
因为疫情延期，以致今年暑假都有唔少大赛，欧国盃同美洲国家盃下个月就开波，东奥如果继续搞，足球都有啲睇头；日本以东道主身份当然有得入围，而两个亚洲名额就落入南韩同澳洲手中。
澳洲仲未公佈奥运大军名单，不过睇初步名单同之前亚青盃比赛，都有唔少澳职球员参与，当中最有前途应该係卢卡柏素，卢卡柏素个叔叔就係前克罗地亚国脚柏素，踢过欧国盃同世界盃，不过卢卡柏素爸爸就唔及细佬咁叻，只踢过克罗地亚乙组，因为南斯拉夫战乱就移居澳洲，卢卡柏素就喺澳洲悉尼出世。
年仅20岁嘅卢卡柏素，五岁已经展示足球天份，加入澳洲当地足球学校，不过实在太超班，叔叔都觉得留喺澳洲学唔到嘢，16岁个阵帮佢搭路，加入克国名门萨格勒布戴拿模嘅青年军，之后转投奥斯积克，今季就以外借身份回流澳职，听闻澳洲同克罗地亚都争紧佢入籍做大国脚。
讲番澳职，因为维省再爆疫情，原定星期六墨城对喷射机比赛延期，得番一场阿德莱德联主场对FC悉尼，两队叫做争紧常规赛亚军，FC悉尼近期专注防守，近三场都冇失波，阿联近期火力跌watt，入球「细」稳阵。下星期日方面，西悉陷入球荒，主场对防守力强嘅狮吼，都好难多波入，一样要「细」，头场威灵顿凤凰对珀斯光辉，凤凰返新西兰主场，特别精神，让得起平/半。
