背水一战勐轰葡萄牙 德国求翻身吼上盘
今晚欧国盃「死亡F组」大战，德国主场火併衞冕嘅葡萄牙。德国为保出线希望，今场冇得再失分，战意高昂誓打翻身仗，加上近4次对住葡萄牙全胜而回，德国小让平半上盘抵玩。
今届F组被公认为死亡之组，德国头两场就要连环面对两支强敌，赛程难度极大。「日耳曼兵团」首战仅负法国，只係晓姆斯不幸摆乌龙。现时虽于小组身处不利位置，但德国贵为欧洲传统劲旅，一向以顽强斗志见称，唔会因为一场失利就轻易放弃。
论人脚德国唔输蚀畀其他对手，上仗主帅勒夫搵基拿比任正前锋，效果麻麻，今场或改派夏维斯踢最前，基拿比堕后同汤马士梅拿从旁支援，加上根度简等一班中场后上，德国进攻能力依然唔可以睇低。
近4次交锋日耳曼兵团全胜
葡萄牙首仗3比0击败匈牙利，表面上取得完美开局，但对手实力麻麻，未受真正考验。查实葡军上仗久攻不下，去到84分钟先至搵到第一个入波，加上基斯坦奴朗拿度其后梅开二度，纯靠个人质素赢波。球队灵魂C朗表现固然出色，但亦暴露出仲要依赖呢位老大哥嘅问题，德国经验咁丰富，自然识得去部署。
事实上葡萄牙近4次遇上德国，都係喺世盃及欧国盃大赛舞台上，结果4次都输波而回，今场再遇「剋星」凶多吉少，德国上盘好路。
