客战弗赖堡抢分踢欧联
德甲今晚独脚戏上演弗赖堡主场迎战利华古逊，作客嘅利华周中惨败畀禾夫斯堡，争欧联入场券又处于下风，好彩球队炮台够多，尤其新星夏维斯德甲重开后连续2仗作客梅开二度，有望极速反弹。弗赖堡入得又失得，仍有机会争欧霸入场券，预计佢哋踢得开放会同利华斗攻，今场2.5球入球大热得嚟够稳阵。
弗赖堡今季表现中规中矩，但仍然有机会争一张欧霸入场券，球会上下应该非常满意现时嘅联赛位置，联赛尚馀6轮已经取得38分，已经比上季及前季嘅36分为多，剩低几场波可以放开怀抱享受赛事。
啱啱周中弗赖堡作客法兰克福嘅德甲赛事，渡边年都有睇，半夜三更有6个入波真係成个人醒晒，弗赖堡踢得够晒性感，领先3比1畀人追番3比3，整场赛事双方合共录得44次射门，可想而知冇乜闷场。其实再对上一仗，弗赖堡对住云达不来梅，球队全场都有17次射门，虽然最终颗粒无收，更以0比1落败，但可以睇得出，球队中前场状态唔差，今次主场出击，入波决心就更加大。
利华近期作客入波多
利华古逊周中惨败1比4畀禾夫斯堡，始终周中快车对球队有一定考验，幸好利华阵中有多名攻击手，除咗新星夏维斯，教练保斯手上仍然可以有唔同中前场球员调动，相信对攻力唔会有太大影响。利华古逊现时联赛形势稍为被动，如果要争欧联入场券，剩番6轮已经不容再失，相信今场一样以攻代守，佢哋作客踢法唔会有太大改变，近8场作客有7场总入球开出3球或以上，强烈推介今场中位数2.5球入球大。
