奥格斯堡求上岸大斗科隆
今晚德甲尾场中下游对决，奥格斯堡主场硬撼科隆。奥堡仍有一定降班威胁，希望藉地利抢分尽快上岸；科隆后衞施巴斯坦波拿奥继续坐波监，随时以攻代守，2.5球嘅入球大乃不二之选。
两军自联赛重开后表现不济，奥格斯堡近4仗联赛只得1胜1和2负，所赢嗰场係击败状态更差嘅史浩克04，不能作准。连同停摆前在内，奥堡近9仗联赛输咗6场，未计今轮赛果，只领先尾3嘅杜塞尔多夫4分，为求尽早上岸，主场出击必抢攻望擸晒3分。
科隆踢法有前冇后
另一边厢，原本停摆前走势唔错嘅科隆，喺联赛重开后大走样，近4仗只得2和2负，仲失咗11粒，除咗侯普特曼、韦斯特拉迪、马素怀斯、祖安哥度巴等受伤外，多明历达斯拿及施巴斯坦波拿奥亦要停赛，尤其係后者缺阵，对防守影响甚大。不过科隆攻力唔曳，箭头莫迪斯迪近3仗联赛省2粒，重拾射门鞋，佢哋近12仗联赛轰入27粒，但仅得3场保持清白之身，全开3球或以上，明显係有前冇后、打死罢就，今仗造访奥堡势必用进攻掩饰防守漏洞，大盘更值得捧场。
